Санаи 18 ноябри соли ҷорӣ дар муассисаи таҳсилоти миёнаи умумии №10-и Ҷамоати шаҳраки Балхи ноҳияи Ҷалолиддини Балхӣ бо иштироки муовини раиси ноҳия оид ба соҳаи идеологӣ Қурбонзода Қурбоналӣ, котиби мақомоти васояту парастории мақомоти иҷроияи ҳокимияти давлатии ноҳия, намояндаи шуъбаи маориф, омӯзгорон ва волидайни хонандагон вохӯрӣ оид ба масъулияти падару модар дар таълиму тарбияи фарзанд, таҳкими ҳамкории падару модарон бо соҳаи маориф, тарбияи фарзандон дар рӯҳияи ватандӯстӣ, пешгирии аз таҳсил дур мондани хонандагон, шомилшавии ҷавонон ба ҳизбу ҳаракатҳои терроризму экстремизм ва пӯшидани либоси ба фарҳанги мо бегона доир гардид.

Қайд гардид, ки масъулияти падару модар дар таълиму тарбияи фарзанд дар рӯҳияи инсондӯстӣ, ифтихори ватандорӣ, эҳтироми арзишҳои миллӣ, умумибашарӣ ва фарҳангӣ, инчунин ҳифзи ҳуқуқу манфиатҳои фарзанд, раванди мақсаднок ба воя расонидани фарзанд аз ҷониби падару модар, муассисаи таълимӣ, ҷомеа ва ба зиндагии мустақилона омода намудан аст.

Гуфта шуд, ки масъалаи бегонапарастӣ дар ҷомеаи мо имрӯзҳо ба яке аз масъалаҳои доғ табдил ёфта, аҳли ҷомеа бояд нисбат ба ин зуҳуроти номатлуб бетараф набошанд ва дар якҷоягӣ бар зидди паҳн шудани урфу одатҳои бегона мубориза баранд. Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои ташвиқу тарғиби либоси миллӣ ва эҳё намудани ҳунарҳои мардумӣ таваҷҷуҳи махсус зоҳир намуда, пайваста таъкид месозанд, ки миллати мо бояд ба расму ойини гузаштагони худ такя намуда, садди роҳи бегонапарастӣ гарданд. Дар ин самт бахусус ба занону модарон рӯ оварда, таъкид менамоянд, ки “...дар шароити ҷаҳонишавӣ модарону бонувони тоҷик барои ҳифзи забон ва таъриху фарҳанги миллӣ, расму ойинҳо ва либосу анъанаҳои халқамон, ки таҳти фишори омезиши фарҳангӣ қарор гирифтааст, беш аз пеш сайъу талош намоянд”.

Ҳамзамон чунин як вохӯрии судбахш бо мураббиёну волидайни таълимгирандагони муассисаҳои таҳсилоти томактабии №3 ва №5-и ноҳияи Ҷалолиддини Балхӣ низ гузаронида шуд.