ФУТБОЛБОЗДУХАРОНИ НОҲИЯ САЗОВОРИ ДИПЛОМИ ҶУМҲУРИЯВӢ ГАРДИДАНД

14 апрели соли 2025 дар толори мақомоти иҷроияи ҳокимияти давлатии ноҳияи Ҷалолиддини Балхӣ маросими бошукӯҳи қадрдонии варзишгарони ҷавон ва фаъолони бахши ҷавонон баргузор гардид. Дар ин чорабинӣ раиси ноҳия Холиқзода Рустам Ҳикматулло, роҳбарони ҳамаи ташкилоту муассисаҳои давлатӣ, варзишгарони фаъоли ноҳия ва намояндагони бахшҳои мухталифи ҷомеа иштирок доштанд.

Маросим бо сухани ифтитоҳии раиси ноҳия оғоз ёфт, ки дар он Холикзода Рустам Ҳикматулло саҳми ҷавонон ва варзишгаронро дар боло бурдани обрӯи ноҳия ва муаррифии қобилияти баланди насли наврас дар сатҳи ҷумҳурӣ баланд арзёбӣ намуданд. Ӯ зикр кард, ки дастгирии ҷавонон ва рушди варзиш аз афзалиятҳои сиёсати иҷтимоии роҳбарияти ноҳия мебошад.

Дар ин рӯз ба дастаи духтарони футболбоз, ки дар мусобиқаи ҷумҳуриявии футзали байни духтарон иштирок намуда, сазовори ҷойи дуюм гардида буданд, бо Диплом ва туҳфаҳои хотиравӣ қадршиносӣ карда шуд. Ин дастоварди муҳими духтарони варзишгар нишон медиҳад, ки варзиши занон дар ноҳия дар ҳоли рушд қарор дорад ва дастгирии мунтазамро тақозо мекунад.

Ҳамзамон, мудири бахши кор бо ҷавонон ва варзиши ноҳияи Ҷалолиддини Балхӣ Исматзода Саидшоҳ барои фаъолиятҳои назаррас ва саҳми арзандааш дар рушди сиёсати давлатии ҷавонон, сазовори Диплом гардид. Ӯ дар озмуни ҷумҳуриявии "Беҳтарин бахши кор бо ҷавонон дар соли 2024" ҷойи намоёнро ишғол намуда, нишон дод, ки ташаббусҳои амалӣ ва барномаҳои татбиқнамудаи ин бахш натиҷаи босамар доранд.

Инчунин, ғолибони озмуни ҷумҳуриявии “Кадбонуи беҳтарин” низ бо Сипосномаҳои ифтихорӣ қадрдонӣ карда шуданд. Ин озмун бо ҳадафи баланд бардоштани мавқеи занон дар ҷомеа, тарғиби фарҳанги хонавода ва саҳми онҳо дар рушду шукуфоии ҷомеа баргузор гардида буд. Чорабиниро фазои тантанавӣ, руҳияи баланди ҷавонон ва муҳити самимият фаро гирифта буд. Ин гуна маросимҳо на танҳо ба қадрдонии заҳмати ҷавонон равона шудаанд, балки ҳамчун ангеза барои рушди минбаъдаи истеъдодҳо ва фаъолияти ташаббускорона хидмат мекунанд.