ИДОРАИ КОММУНАЛӢ КӮЧАИ МАРКАЗИРО АЗ ИФЛОСӢ ПОКИЗА КАРД

14 апрели соли 2025 бо ташаббуси идораи коммуналии ноҳияи Ҷалолиддини Балхӣ корҳои тоза ва озодасозии қубурҳои обгузари кӯчаи марказӣ амалӣ гардиданд.

Дар ҷараёни ин иқдом кормандони шуъбаи обу корез бо истифода аз таҷҳизоти зарурӣ қубурҳои обгузарро аз ифлосӣ ва монеаҳо поксозӣ намуда, равиши обро ба низом дароварданд. Ҳамзамон, гирду атрофи қубурҳо аз алафҳои бегона ва партовҳои гуногун тоза карда шуда, муҳити атроф симои тоза ва зебо касб кард.

Ин амали нек дар доираи корҳои ободониву созандагӣ ва дар ростои иҷрои Барномаи рушди маҳаллӣ роҳандозӣ гардида, ҳадафи он беҳтар намудани шароити санитарӣ ва муҳайё сохтани муҳити солим барои сокинон мебошад.

Мақомоти иҷроияи ҳокимияти давлатии ноҳия чунин ташаббусҳоро ҳамчун намунаи хизмат ба ҷомеа арзёбӣ намуда, таъкид карданд, ки корҳои ободонӣ дар дигар кӯчаву маҳаллаҳо низ давоми ҳафта ҳамарӯза идома хоҳанд ёфт.