НАВРӮЗ БО НАМОИШИ ҲУНАРҲОИ МИЛЛӢ ВА ҚАДРДОНИИ ҶАВОНОН ТАҶАССУМ ЁФТ

   Рӯзи 26 апрели соли 2025 дар Ҷамоати шаҳраки Гулистони ноҳияи Ҷалолиддини Балхӣ ҷашни байналмилалии Наврӯз бо шукуҳу шаҳомати хоса баргузор шуд. Дар ин чорабинии фарҳангӣ муовини раиси ноҳия Қурбонзода Қурбоналӣ ва дигар масъулини иштирок намуда, ҷараёни баргузории ҷашнро назорат ва дастгирӣ намуданд.

 Дар саҳни намоишгоҳ гӯшаҳои гуногун бо анвои сершумори таомҳои миллӣ, аз ҷумла суманак, оши бурида, Ҳафтсин ва Ҳафтшин, сабзавот ва меваҷоти гуногун оро ёфта буданд. Ҳунармандону ошпазони маҳаллӣ беҳтарин маҳсули дастони ҳунарии худро пешниҳоди меҳмонон ва ҳозирон гардонида, гӯшаҳои намоиширо ба як намуди идона ва пуршукӯҳ табдил доданд. Дар ҷараёни боздид роҳбарияти ноҳия бо ҳунармандон ва намояндагони касбу ҳунарҳои мардумӣ суҳбатҳои гарму самимӣ анҷом дода, саҳми онҳоро дар ҳифз ва рушди фарҳанги миллӣ ва анъанаҳои суннатӣ баланд арзёбӣ намуданд.

Сипас, муовини раиси ноҳия Қурбонзода Қурбоналӣ суханронӣ намуда, аз номи раиси ноҳия Холиқзода Рустам Ҳикматулло сокинони ҷамоатро бо фарорасии ҷашни Наврӯз табрик гуфта, аз нақши ин ҷашни бостонӣ дар таҳкими дӯстӣ ва ваҳдати миллӣ ёдовар шуд.

Дар доираи чорабинӣ, шаш нафар ҷавонписароне, ки хизмати ҳарбиро бо сарбаландӣ анҷом додаанд, бо Сипосномаҳои бахши кор бо ҷавонон ва варзиши ноҳия қадрдонӣ гардиданд. Ин иқдом ҳамчун рамзи эҳтиром ва арҷгузорӣ ба ҷавонмардӣ ва ватандӯстии насли ҷавон қабул шуд. Қисмати фарҳангии чорабинӣ бо ҳузури сарояндаи шинохта Ҷанатулло Абдуллоев, суруду рақси миллӣ ва барномаҳои шавқовари шодӣ ғанӣ гардонида шуда, рӯҳу илҳоми идонаи иштирокдоронро боз ҳам бештар афзуд.