ҚУБУРИ ОБГУЗАРИ МИЁНИ ҶАМОАТҲОИ ЗОЛИ ЗАР ВА БАЛХ ТАЪМИР ГАРДИД

        Дар натиҷаи фарсуда ва корношоям гардидани қубури обгузар дар роҳи мошингарди байни Ҷамоати деҳоти Золи Зар ва Ҷамоати шаҳраки Балх, ҳаракати нақлиёт ва рафтуомади сокинон ба мушкил мувоҷеҳ гардида буд. Бо дарназардошти аҳаммияти ин роҳ барои зиндагии рӯзмарраи аҳолӣ, корҳои таъмиру навсозии қубури мазкур ба роҳ монда шуданд. Тибқи иттилои дастрас, ин иқдом бо ташаббуси шахсии як сокини Ҷамоати деҳоти Ҳалевард роҳандозӣ гардида, дар ҳамоҳангӣ бо мақомоти масъули ҷамоат ва дастгирии идораи роҳи ноҳия амалӣ гардид. Дар ҷараёни кор, қубури куҳнаи обгузар пурра бардошта шуда, ба ҷойи он қубури наву муосир бо иқтидори беҳтар насб карда шуд, ки қобилияти бештари обгузариро дорост ва ба талаботи меъёрҳои муҳандисӣ ҷавобгӯ мебошад. Масъулини ҷамоат таъкид мекунанд, ки чунин ташаббусҳо барои беҳтарсозии инфрасохтори маҳаллӣ ва ҳалли мушкилоти ҷамъиятӣ хеле арзишманданд. Онҳо инчунин омодагии худро барои дастгирии дигар иқдомҳои шаҳрвандон, ки ба манфиати умум равона шудаанд, иброз доштанд. Сокинони маҳал аз анҷоми саривақтии кор изҳори қаноатмандӣ намуда, миннатдории худро ба шахсони ташаббускор ва мақомоти иҷроия баён карданд.