"ТОҶИКОНА МЕПӮШЕМ" - БОЗГАШТ БА РЕШАҲОИ ФАРҲАНГӢ

   Рӯзи 3 майи соли 2025, дар ноҳияи Ҷалолиддини Балхӣ чорабинии фарҳангии пуршукӯҳ таҳти унвони “Тоҷикона мепӯшем” баргузор гардид, ки ҳадафи он тарғиб ва эҳёи арзишҳои миллӣ, аз ҷумла либоси суннатии тоҷикон, ба ҳисоб меравад.

 Ин иқдоми фарҳангӣ бо ташаббуси бахши кор бо занон ва оилаи мақомоти иҷроияи ҳокимияти давлатии ноҳия баргузор шуда, бонувони фаъол, духтарони ҳунарманд ва дӯстдорони фарҳанги миллӣ дар он саҳми арзанда гузоштанд.

Дар фазои рангоранг ва идона, иштирокчиён бо бардоштани намунаҳои гуногуни либоси анъанавии тоҷикӣ ба саҳна омаданд, ки ҳар кадоме рамзи як гӯшаи фарҳанги ғании миллати тоҷик буд. Либосҳои миллии пешниҳодшуда, ки аз атласу адрас, чакан ва гулдӯзиҳои маҳаллӣ иборат буданд, дар баробари зебоии зоҳирӣ, аз муҳтавои фарҳангӣ ва таърихи қадимаи миллати тоҷик ҳикоят мекарданд.

Ҳамзамон, тавассути ин чорабинӣ масъулон талош карданд то таваҷҷуҳи ҷомеа, бахусус ҷавононро ба риояи ҳувияти миллӣ ва худшиносӣ ҷалб намоянд. Ба гуфтаи масъулони бахши кор бо занон, чунин иқдомҳо на танҳо зебоии зоҳирии либоси тоҷикӣ, балки тарзи зиндагии мардумиро дар худ таҷассум мекунанд.

Онҳо бар ин назаранд, ки либоси миллӣ на танҳо василаи пӯшиш, балки як рукни муҳими маънавият ва худшиносии миллӣ мебошад. Чорабинии “Тоҷикона мепӯшем” боз як қадами устувор дар роҳи посдории суннатҳои миллӣ ва таҳкими ҳисси ватандӯстӣ миёни занону духтарон арзёбӣ гардид.

Иштироки фаъоли табақаҳои гуногуни ҷомеа дар чунин барномаҳо далели равшани эҳтиром ба арзишҳои таърихӣ ва фарҳангии миллат маҳсуб мешавад.