80-СОЛАГИИ РӮЗИ ҒАЛАБА: ҶАВОНОН БО ТАЪРИХИ ҶАНГ ВА ҚАҲРАМОНИҲО ОШНО ШУДАНД

   Бо мақсади гиромидошти хотираи шаҳидони Ҷанги Бузурги Ватанӣ ва сазовор таҷлил намудани 80-солагии Рӯзи Ғалаба бар фашизм, аз 1 то 9 майи соли 2025 дар ноҳияи Ҷалолиддини Балхӣ “Ҳафтаи поси хотир” эълон гардид. Ин иқдом тибқи нақшаи чорабиниҳои мақомоти иҷроияи ҳокимияти давлатии ноҳия дар ҳамбастагӣ бо Кумитаи иҷроияи Ҳизби Халқии Демократии Тоҷикистон дар ноҳия амалӣ шуда, ҳадафи он баланд бардоштани эҳсоси ватандӯстӣ, арҷгузорӣ ба таърих ва бедор кардани ҳисси масъулияти шаҳрвандӣ дар миёни насли ҷавон мебошад.

Дар доираи чорабиниҳо рӯзи 5 май аъзои Ташкилоти ҷамъиятии ҷавонон “Созандагони Ватан” аз Осорхонаи таърихӣ-кишваршиносии ноҳия боздид намуданд. Дар рафти ин боздид ҷавонон бо асноду маводи таърихӣ, аксу санадҳо, ёдгориҳо ва ашёи шахсии иштирокчиёни Ҷанги Бузурги Ватанӣ шинос шуданд.

Зимни суҳбат бо ҷавонон, масъулини Осорхона ва намояндагони Кумитаи иҷроия аз набардҳои шадид ва фоҷиабори ҷанг, саҳми фарзандони барӯманди миллати тоҷик дар таъмини ғалаба бар фашизм, ҷоннисориҳои онҳо дар роҳи ҳимояи сулҳу озодӣ ва муҳаббат ба Ватан сухан карданд. Масъулин таъкид намуданд, ки набояд қаҳрамониҳои гузаштагон фаромӯш шаванд ва ҷавонон бояд таърихи пурифтихори халқи худро хуб донанд. Онҳо қайд карданд, ки ҳифзи сулҳу субот ва ободонии кишвар имрӯз бар дӯши ҷавонон ҳамчун нерӯи созандаву ояндасоз вогузор гардидааст.

Ин чорабинӣ, ки дар фазои эҳтирому арҷгузорӣ ба таърихи миллӣ баргузор гардид, дар қалби ҷавонон ҳисси ифтихор аз миллат ва руҳияи ватандӯстиро боз ҳам боло бурд. Чунин ташаббусҳо намунаи ибрат ва шоҳиди равшани сиёсати хирадмандонаи Пешвои миллат дар самти баланд бардоштани худшиносии миллӣ ва гиромидошти арзишҳои таърихии халқи тоҷик мебошанд.