ЭҲТИРОМ БА НАСЛИ ҶОННИСОРИ ҶАНГ: ҚАДРДОНИИ ЯГОНА ИШТИРОКЧИИ ҶАНГИ БУЗУРГИ ВАТАНӢ ДАР НОҲИЯ

   Ба муносибати Рӯзи Ғалаба, ки ҳамасола 9 май таҷлил мегардад, дар ноҳияи Ҷалолиддини Балхӣ иқдоми арзандаи қадрдонӣ аз пирони ҷанг сурат гирифт. Дар ин минтақа, феълан танҳо як нафар иштирокчии Ҷанги Бузурги Ватанӣ дар қайди ҳаёт аст - Машраб Давлатов, ки умри бобаракати ӯ ба 99 расидааст.

Субҳи рӯзи 7 майи соли 2025 намояндагон аз Дастгоҳи иҷроияи Президенти Ҷумҳурии Тоҷикистон ва Мақомоти иҷроияи ҳокимияти давлатии вилояти Хатлон ба ноҳия сафари корӣ анҷом дода, ҳамроҳ бо раиси ноҳия Холиқзода Рустам Ҳикматулло ба манзили Машраб Давлатов рафта, бо ҳолу аҳволи ӯ шинос шуданд.

Дар доираи ин мулоқот, Пешвои миллат муҳтарам Эмомалӣ Раҳмон ба пирони ҷанг таваҷҷуҳи махсус зоҳир намуда, туҳфаи пулии худро ба маблағи 50 ҳазор сомонӣ ба ин иштирокчии наҷиби ҷанг фиристоданд. Ҳамзамон ӯро бо медали 80-солагии "Рӯзи Ғалаба" қадрдонӣ намуданд. Инчунин, аз ҷониби Мақомоти иҷроияи ҳокимияти давлатии вилояти Хатлон ба Машраб Давлатов 10 ҳазор сомонӣ ва аз тарафи мақомоти иҷроияи ҳокимияти давлатии ноҳияи Ҷалолиддини Балхӣ 5 ҳазор сомонӣ туҳфаи пулӣ тақдим карда шуд. Машраб Давлатов зимни суҳбат бо меҳмонон ва дарёфти туҳфаҳо, аз таваҷҷуҳи ҳамешагии роҳбарияти олии кишвар изҳори миннатдорӣ намуда, бо самимият дуои нек барои сулҳу субот ва ваҳдати миллии Тоҷикистон карданд.

Ӯ саҳми Пешвои муаззами миллат муҳтарам Эмомалӣ Раҳмонро дар пойдории амният ва суботи кишвар хеле арзишманд шуморид ва аз ёдоварӣ ва қадрдонии хизматҳои гузаштаи худ ифтихор намуд. Ин иқдоми инсондӯстона бори дигар собит месозад, ки арҷгузорӣ ба қаҳрамонони Ватан на танҳо вазифа, балки нишони маданият ва вафодорӣ ба таърихи миллат аст.