ҚАБУЛИ САЙЁР ДАР ҶАМОАТИ ДЕҲОТИ НАВОБОД: ҚАДАМЕ МУҲИМ БА САМТИ ҲАЛЛИ МУШКИЛОТИ ИҶТИМОӢ

       Бо ҳадафи иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти таҳкими робитаи мустақим бо шаҳрвандон ва баррасии мушкилоти мавҷуда, рӯзи 10 майи соли 2025 дар Ҷамоати деҳоти Навободи ноҳияи Ҷалолиддини Балхӣ қабули сайёри шаҳрвандон баргузор гардид.

Ин иқдом тибқи нақшаи кории мақомоти иҷроияи ҳокимияти давлатии ноҳия роҳандозӣ шуда, бо иштироки раиси ноҳия Холиқзода Рустам Ҳикматулло ва прокурори ноҳия Собирзода Искандар Миралӣ сурат гирифт. Қабули шаҳрвандон дар толори маҷлисгоҳи ҷамоат баргузор шуда, аҳолӣ бо масъалаҳо ва муроҷиатҳои муҳими иҷтимоиву иқтисодӣ ба роҳбарияти ноҳия рӯ ба рӯ суҳбат намуданд.

Мавзӯъҳои матраҳшуда асосан ба масъалаҳои истифодаи оқилонаи замин, зарурати сохтмони бунгоҳи тиббӣ, ташкили қуттиҳои партов дар кӯчаҳои ҷамоат, мушкилоти соҳаи андозу кишоварзӣ, танзими истифодаи нерӯи барқ ва дигар масъалаҳои ҳалталаб ба инфрасохтор марбут буданд. Раиси ноҳия ба ҳар як муроҷиаткунанда бо таваҷҷуҳи хос гӯш дода, барои баррасии амиқ ва ҳалли мушкилоти пешниҳодшуда, ба масъулини ҷамоат ва роҳбарони сохторҳои дахлдор супоришҳои мушаххас ироа намуд.

Холиқзода Рустам Ҳикматулло дар суханронии худ таъкид намуд, ки муроҷиатҳои мардум бояд бо масъулият ва дар муҳлатҳои кӯтоҳ баррасӣ гарданд. Ӯ зикр кард, ки қаноатмандии шаҳрвандон ва баланд бардоштани сатҳи некуаҳволии онҳо аз самтҳои муҳими сиёсати мақомоти маҳаллӣ ба шумор меравад.

Дар идомаи чорабинӣ, прокурори ноҳия Собирзода Искандар Миралӣ баромад намуда, дар бораи зарурати пешгирии падидаҳои номатлуби иҷтимоӣ, аз ҷумла ифротгароиву терроризм, инчунин аҳамияти тарбияи дурусти насли наврас, истифодаи самараноки захираҳои табиӣ, нерӯи барқ ва пешгирии сохтмонҳои худсарона сухан гуфт.

Қабули сайёри шаҳрвандон ба ҳайси василаи муассир дар таҳкими робитаи мардум бо мақомоти иҷроия арзёбӣ шуда, чунин чорабиниҳо ба ҳалли амалии мушкилоти сокинон ва баланд бардоштани сатҳи эътимоди ҷомеа мусоидат менамоянд.