ДУЗДОНИ ЧОРВО ДАР НОҲИЯ БА ДАСТ АФТОДАНД

      Дар натиҷаи баргузории тадбирҳои оперативӣ - ҷустуҷӯии кормандони мақомоти корҳои дохилӣ дар ноҳияи Ҷалолиддини Балхӣ ду сокини маҳаллӣ, ки ба дуздии чорвои калони шохдор гумонбар дониста мешаванд, дастгир карда шуданд. Мувофиқи иттилои расмии шуъбачаи тафтишотии ШВКД, шахсони боздоштшуда Атоев Шамсиддин, соли таваллудаш 1980 ва Ҳакимов Ҳалим, соли таваллудаш 1983 буда, ҳарду сокинони ҳамин ноҳия мебошанд.

Тафтишот нишон дод, ки ин афрод қаблан бо маслиҳати пешакӣ нақшаи дуздии чорворо таҳия намуда, онро асосан дар вақти шабона, дар заминҳои хоҷагиҳои деҳқонӣ ва дар ҳолати набудани назорат аз ҷониби сокинон амалӣ мекарданд.

Манбаъ меафзояд, ки чорвои дуздидашударо онҳо ба минтақаҳои дигар бурда, ба фурӯш мебаровардаанд. Ба ҳисоби пешакии мақомот, аз ин амали ҷиноятии онҳо ба чандин шаҳрванд зарари ҷиддии молиявӣ расонида шудааст, ки маблағи умумии он 117 ҳазор сомониро ташкил медиҳад.

Баъди анҷоми марҳалаи аввалияи тафтишот маълум гардидааст, ки Шамсиддин Атоев дар шаш ҳолати дуздӣ ва ҳамроҳи ӯ - Ҳалим Ҳакимов дар ду ҳолати ҷудогонаи дуздии чорво даст доранд. Ҳодисаҳои мазкур дар қаламрави ноҳияҳои Ҷалолиддини Балхӣ, Ҷайҳун ва Дустӣ ба қайд гирифта шудаанд.

Дар асоси маводи ҷамъовардашуда нисбати шахсони гумонбаршуда бо моддаи 244 қисми 3-и Кодекси ҷиноятии Ҷумҳурии Тоҷикистон (дуздӣ дар ҳаҷми калон ё бо гурӯҳ) парвандаи ҷиноятӣ оғоз гардида, феълан таҳқиқи амиқи қазия идома дорад. Мақомот ҳушдор медиҳанд, ки чунин амалҳои ҷиноятӣ на танҳо ба иқтисоди оилавии сокинон таъсири манфӣ мерасонад, балки боиси ноамнии иҷтимоӣ низ мегардад.

Дар ҳамин замина, кормандони ШВКД дар ноҳияи Ҷалолиддини Балхӣ шаҳрвандонро даъват менамоянд, ки нисбати молу мулки худ бештар эҳтиёткор бошанд ва дар сурати мушоҳидаи ҳаракатҳои шубҳанок ба мақомоти ҳифзи ҳуқуқ сари вақт муроҷиат намоянд.