УСУЛИ "ДЕҲА БА ДЕҲА": МАРДУМ БА ҲАМГИРОӢ ВА ҲУШЁРӢ ДАЪВАТ ШУДАНД

         Санаи 13 майи соли 2025, дар деҳаҳои Наврӯз ва Пушкини Ҷамоати деҳоти Навободи ноҳияи Ҷалолиддини Балхӣ, бо иштироки муовини раиси ҷамоат Азизхоним Самизода, раисони маҳаллаҳо Ҷонона Абдсамадова, Ҳасан Назаров ва фаъолону сокинони маҳаллӣ вохӯрии таблиғотӣ дар доираи усули “Деҳа ба деҳа” баргузор гардид.

 Мақсад аз баргузории ин вохӯрӣ баланд бардоштани сатҳи маърифати сокинон дар самти ҳифзи арзишҳои миллӣ, тарғиби тарзи ҳаёти солим ва истифодаи оқилонаи захираҳои табиӣ арзёбӣ гардид. Дар ҷараёни ин вохӯрӣ масъулин доир ба пешгирии таблиғи фарҳанги бегона, хусусан дар либоспӯшии ҷавонон ва тарғиби либоси миллии тоҷикӣ, баён намуданд, ки пӯшидани либоси миллӣ на танҳо ифтихор, балки пос доштани суннатҳои деринаи фарҳанги тоҷикон аст.

Зикр гардид, ки пайравӣ ба мӯдҳои бегона метавонад ба коста шудани ҳувияти миллӣ ва дуршавӣ аз арзишҳои фарҳангӣ оварда расонад. Ҳамзамон, зарурати истифодаи самараноки замин, махсусан заминҳои наздиҳавлигӣ, мавриди муҳокима қарор гирифт. Мавзӯи сарфакорона истифода бурдани неруи барқ, бахусус дар фасли гармӣ, бо такя ба таҷрибаи сокинон ва дастурҳои масъулин, бо мисолҳои равшан шарҳ дода шуд.

Дар қисмати дигар, масъулин оид ба пешгирии шомилшавии ҷавонон ба гурӯҳҳои ифротгаро ва таъсири манфии чунин ҳаракатҳо ба ҷомеа суханронӣ карданд. Таъкид гардид, ки тарбияи дурусти фарзандон, баланд бардоштани сатҳи маърифат ва огоҳии сиёсӣ воситаи муассири пешгирӣ аз ин падидаи номатлуб мебошад.

Сокинони маҳалла бо изҳори сипос аз ташкили чунин мулоқоти муфид, пешниҳодҳо ва саволҳои худро низ баён карданд, ки аз ҷониби масъулин ҷавобҳои мушаххас дода шуданд. Ҳамзамон таъкид шуд, ки чунин вохӯриҳо дар дигар деҳаҳои ҷамоат низ идома хоҳанд ёфт, то ҳисси масъулият ва огоҳии шаҳрвандон дар ҳалли мушкилоти иҷтимоӣ ва фарҳангӣ боз ҳам бештар гардад.