ЧИЛ РӮЗ БАХШИДА БА КӮДАКОН - ТАРБИЯТ, ҲУНАР ВА ШОДМОНӢ

      Бо мақсади тарғиби арзишҳои кӯдакон ва таҳкими муҳити солими маънавию ахлоқӣ барои онҳо, дар доираи тадбирҳои шуъбаи маорифи ноҳияи Ҷалолиддини Балхӣ бахшида ба таҷлили Рӯзи байналмилалии муҳофизати кӯдакон, иқдоми фарҳангию тарбиявии “Чил рӯзи ҳаёти кӯдакон” дар муассисаҳои томактабии ноҳия оғоз гардидааст.

Дар доираи ин иқдом, санаи 14 майи соли 2025 чорабиниҳои идона дар як қатор муассисаҳои томактабӣ, аз ҷумла муассисаи хусусии таълимии томактабии “Санавбар”, муассисаҳои томактабии №1 ва №6-и ноҳия бо иштироки фаъолонаи кӯдакон, волидайн ва омӯзгорон доир гардиданд. Мақсад аз баргузории ин чорабиниҳо - фароҳам овардани фазои идона, рушди қобилиятҳои эҷодӣ, тарбияи ҳисси зебоишиносӣ ва тақвияти рӯҳияи миллӣ дар кӯдакон мебошад.

Бино ба иттилои масъулини шуъбаи маорифи ноҳия, "Чил рӯзи ҳаёти кӯдакон" аз силсилаи чорабиниҳои гуногун иборат буда, аз рӯзи 14 май оғоз ёфта, то 1 июн - Рӯзи байналмилалии муҳофизати кӯдакон идома меёбад. Дар ин муддат озмунҳои рассомӣ, шеърхонӣ, наворбардорӣ, нақшофарӣ, ҳунарҳои дастӣ, мусобиқаҳои варзишӣ, бозиҳои эҷодӣ ва дигар намоишҳои фарҳангӣ ба нақша гирифта шудаанд.

Ин чорабиниҳо дар ҳамкорӣ бо волидон, омӯзгорон ва мутахассисони соҳа амалӣ гардида, муҳити созгору рӯҳбаландро барои кӯдакон фароҳам меоранд. Мураббиёни муассисаҳои томактабӣ зикр карданд, ки чунин ташаббус ба рушди ҷисмонӣ ва зеҳнии кӯдакон мусоидат мекунад ва имконият медиҳад, то онҳо истеъдод ва малакаҳои хешро нишон диҳанд. Гуфта шуд, ки “Чил рӯзи ҳаёти кӯдакон” на танҳо як маъракаи тарбиявӣ, балки таҷассуми муҳаббату таваҷҷуҳи ҷомеа нисбат ба насли наврас мебошад.