САНҶИШИ САТҲИ ДАРСОМӮЗӢ ВА ОМОДАГИИ ХАТМКУНАНДАГОН ДАР НОҲИЯ

       16 майи соли 2025 бо мақсади баланд бардоштани сатҳу сифати таълим ва санҷиши омодагии муассисаҳои таҳсилоти миёнаи умумӣ ба аттестатсияи давлатӣ, муовини раиси ноҳияи Ҷалолиддини Балхӣ оид ба соҳаи иҷтимоӣ Шукурзода Шаҳло аз як қатор муассисаҳои таълимӣ дар Ҷамоати деҳоти Золи Зар боздид намуд.

Шукурзода Шашло аз фаъолияти муассисаҳои таҳсилоти миёнаи умумии рақамҳои 25, 29 ва 30 боздид ба амал оварда, бо шароити омӯзишу таълим, иштироки хонандагон дар дарсҳо ва вазъи таъминот бо лавозимоти хониш шинос гардид. Дар ҳар як муассиса роҳбарияти мактаб ва омӯзгорон доир ба корҳои омодагӣ ба аттестатсияи хатмкунандагон маълумот доданд.

Зимни суҳбат бо омӯзгорону хонандагон таъкид гардид, ки бо наздик шудани муҳлати имтиҳонҳои хатм, зарур аст таваҷҷуҳ ба сифати таълим, омодагии назариявӣ ва амалӣ, инчунин риояи тартибот ва интизоми мактабӣ боз ҳам тақвият дода шавад.

 Муовини раиси ноҳия ба масъулини соҳа дастур дод, ки назорати дохилимактабӣ оид ба сатҳи азбаркунии маводи дарсӣ, иштирок дар дарсҳо ва омодагии равонӣ ва ахлоқии хонандагон ба аттестатсия пурзӯр карда шавад.

Ӯ ҳамчунин зикр кард, ки мақомоти иҷроияи ҳокимияти давлатӣ ва шуъбаи маорифи ноҳия барои таъмини шароити зарурӣ дар муассисаҳои таълимӣ тадбирҳои мушаххасро амалӣ менамоянд.

Дар фарҷоми боздид, Шукурзода Шаҳло изҳори боварӣ намуд, ки хатмкунандагони муассисаҳои мазкур метавонанд бо натиҷаҳои хубу сазовор аттестатсияи давлатиро гузаранд ва барои таҳсили минбаъда дар зинаҳои болоии таҳсилот омодагии ҷиддӣ бинанд.