ЗАХИРАҲОИ САФАРБАРӢ ДАР САНҶИШИ АМАЛӢ

      Рӯзи 17 майи соли 2025 дар Варзишгоҳи марказии «Панҷшер»-и ноҳияи Ҷалолиддини Балхӣ санҷиши умумии омодабошии қувваҳо ва захираҳои сафарбарӣ баргузор гардид. Дар чорабинӣ муовини аввали вазири мудофиаи Ҷумҳурии Тоҷикистон - сардори Ситоди генералии Қувваҳои Мусаллаҳ генерал-лейтенант Саидзода Бобоҷон, муовини раиси ноҳия Қурбонзода Қурбоналӣ ва масъулони сохторҳои дахлдор иштирок намуданд.

Ин санҷиш бо ҷалби шумораи зиёди шаҳрвандони эҳтиётӣ, ки бо эҳсоси баланди ватандӯстӣ ҳузур ёфтанд, доир гардида, бозгӯи омодагии онҳо барои дифоъ аз хоки Ватан мебошад. Зимни суханронӣ муовини раиси ноҳия Қурбонзода Қурбоналӣ ба мавзӯи аҳамияти мудофиаи миллӣ дахл намуда, таъкид кард, ки системаи мудофиа маҷмуи тадбирҳои сиёсӣ, иқтисодӣ, иҷтимоӣ, ҳарбӣ ва ҳуқуқиро фаро мегирад, ки ба ҳифзи соҳибистиқлолӣ, якпорчагии марзӣ ва суботи давлат равона шудааст. Гуфта шуд, ки мудофиа вазифаи муҳими давлат ва мардум ба шумор меравад ва тайёрии доимии Қувваҳои Мусаллаҳ, иқтисодиёт ва аҳолӣ дар ин самт нақши калидӣ мебозад.

Баргузории чорабинӣ дар сатҳи баланди ташкиливу фаннӣ сурат гирифта, барои он тамоми инфрасохтори зарурӣ, аз хадамоти тиббиву ёрии таъҷилӣ то воситаҳои сӯхторхомӯшкунӣ омода карда шуда буданд. Шаҳрвандон ва кормандони ташкилотҳо техника ва таҷҳизоти худро ба намоиш гузошта, садоқати худро нисбат ба амнияти кишвар ва омодагии худро ба ҳифзи он нишон доданд.

Дар идома, ҳайати Вазорати мудофиа ва роҳбарияти ноҳия аз намоиши техникӣ боздид намуда, бо иштирокдорони машқҳо суҳбат анҷом доданд. Масъулин дар изҳоротҳои худ ба аҳамияти ташкили чунин машқҳо таъкид намуданд, ки дар ҳар вазъияти сиёсиву иҷтимоӣ чунин санҷишҳо барои боло бурдани сатҳи омодабошии шаҳрвандон аҳамияти бузург доранд. Ин чорабинӣ як бори дигар нишон дод, ки шаҳрвандони кишварамон таҳти сиёсати Пешвои муаззами миллат, муҳтарам Эмомалӣ Раҳмон барои ҳифзи марзу буми Ватан, субот ва арзишҳои миллӣ ҳамеша омодаанд ва бо эҳсоси баланди масъулият ва садоқат хизмат менамоянд.