БАРРАСИИ ПАЁМАДҲОИ КОРРУПСИЯ ДАР ҶАЛАСАИ НАВБАТӢ

      Санаи  25-уми майи соли 2025 дар толори мақомоти иҷроияи ҳокимияти давлатии ноҳияи Ҷалолиддини Балхӣ ҷаласаи васеъ таҳти унвони “Муқовимат бо коррупсия - кафолати рушди устувори ҷомеа” баргузор гардид. Дар чорабинӣ муовини раиси ноҳия Қурбонзода Қурбоналӣ, нозири шуъбаи раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Хатлон Сайдамирзода Ҷамшед, роҳбарони ташкилоту муассисаҳо, намояндагони ҷомеаи шаҳрвандӣ ва фаъолони ноҳия иштирок намуданд. Ҷаласа бо сухани ифтитоҳии муовини раиси ноҳия Қурбонзода Қурбоналӣ оғоз ёфт.

Ӯ таъкид намуд, ки коррупсия дар ҳама давру замон ҳамчун як амали паст ва хавфнок эътироф мешавад. Ба гуфтаи ӯ ҳар як шахс бояд пеш аз даст задан ба амалҳои коррупсионӣ, аввал ба ояндаи худ ва фарзандонаш андеша намояд. “Коррупсия ҷомеаро аз дарун хароб мекунад, адолатро аз байн мебарад ва боиси коста шудани эътимоди мардум ба ҳокимият мегардад”, - иброз дошт Қурбонзода Қурбоналӣ.

Сипас, Сайдамирзода Ҷамшед - намояндаи раёсати Агентии назорати давлатии молиявӣ ва мубориза бо коррупсия дар вилояти Хатлон, дар мавзӯи "Паёмадҳои хатарноки коррупсия дар ҷомеа" маърӯза кард. Ӯ таъкид намуд, ки ин падидаи номатлуб танҳо мушкили дохилии як кишвар нест, балки ба як мушкили глобалӣ табдил ёфтааст, ки барои амнияти давлат ва рушди иқтисодии он таҳдиди ҷиддӣ эҷод мекунад.

Гуфта шуд, ки коррупсия ахлоқ ва виҷдони ҷомеаро мекушад. Вақте ки қонун бо пул хариду фурӯш мешавад, дигар наметавон аз адолат ҳарф зад. Мавсуф ҳамзамон афзуд, ки коррупсия наслҳои ояндаро низ зери хатари ҷиддӣ қарор медиҳад.

Зеро агар фарзандон дар муҳити пур аз порахӯрӣ ба воя расанд, эҳтимоли такрори чунин рафтор аз ҷониби онҳо низ зиёд мешавад. Ӯ аз ҳамаи иштирокчиён даъват ба амал овард, ки барои решакан намудани ин падидаи номатлуб муттаҳидона ва бо масъулияти баланд амал намоянд.

Дар анҷоми ҷаласа, иштирокчиён пешниҳодҳо ва андешаҳои худро дар мавриди роҳҳои самараноки муқовимат бо коррупсия баён дошта, изҳори омодагӣ намуданд, ки дар таҳкими ҷомеаи бе пора ва адолатпеша саҳмгузор хоҳанд буд. Чунин вохӯриҳо ба хотири баланд бардоштани маърифати ҳуқуқӣ, ахлоқӣ ва шаҳрвандии сокинон баргузор гардида, барои тақвияти мубориза бо коррупсия дар сатҳи маҳаллӣ нақши муҳим мебозанд.