МУСОБИҚАИ ГӮШТИНИ МИЛЛӢ БАХШИДА БА РӮЗИ ВАҲДАТИ МИЛЛӢ

            Рӯзҳои 24-25 июни соли 2025 дар толори хусусии Сафар Баротов, ки дар Ҷамоати шаҳраки Балхи ноҳияи Ҷалолиддини Балхӣ ҷойгир аст, мусобиқаи варзишӣ оид ба гӯштини миллӣ (гӯштингирӣ) бо ширкати варзишгарони наврас баргузор гардид.

Ин чорабинӣ дар доираи нақшаи чорабиниҳои бахшида ба Рӯзи Ваҳдати миллӣ бо ташаббуси Муассисаи давлатии мактаби варзишии ноҳия ташкил ва дар сатҳи баланд баргузор шуд. Дар мусобиқа зиёда аз 80 нафар варзишгарони наврасе, ки солҳои таваллудашон 2011-2013 мебошанд ва дар мактаби варзишии ноҳия тамрин мекунанд, ширкат варзиданд.

Варзишгарон бо руҳияи баланди ватандӯстӣ ва муҳаббат ба фарҳанги миллӣ ба сабқат баромаданд. Дар фарҷоми мусобиқа ғолибон ва беҳтарин иштирокчиён бо Диплом ва медалҳои ифтихории Муассисаи давлатии мактаби варзишии ноҳия ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон қадрдонӣ шуданд.

Ташкил ва баргузор намудани чунин чорабиниҳои варзишӣ ҳадафҳои муҳим доранд: -тарғиб ва рушди гӯштини миллӣ миёни наврасону ҷавонон; -ташвиқи тарзи ҳаёти солим ва ҷалби бештари наврасон ба варзиш, хусусан дар мавсими таътили тобистона; -пешгирии падидаҳои номатлуб ба монанди ҷинояткорӣ, нашъамандӣ ва дигар хатариҳои иҷтимоӣ дар миёни наврасону ҷавонон; -кашф ва муайянсозии варзишгарони боистеъдод барои иштирок дар чорабиниҳои минбаъдаи ҷумҳуриявӣ ва байналмилалӣ. Баргузории чунин мусобиқаҳо барои таҳкими ҳисси ватандӯстӣ ва рушди тарбияи ҷисмонӣ миёни насли наврас заминаи мусоид фароҳам меоранд.