ИСТИҚЛОЛИЯТ - АРЗИШИ МУҚАДДАСИ СОКИНОН

      Санаи 21 августи соли равон, дар ноҳияи Ҷалолиддини Балхӣ бо иштироки роҳбарият, кормандони ташкилоту муассисаҳо, идораву корхонаҳо, ҷамоатҳои шаҳраку деҳот ва сокинони ноҳия ҳамоиши бошукӯҳ таҳти унвони “Шукӯҳи Истиқлол” баргузор шуд. Чорабиниро Нозироти андози ноҳия дар ҳамоҳангӣ бо Идораи беҳдошти замин ва обёрӣ, АИО ва Раёсати Агентии суғуртаи иҷтимоӣ ва нафақаи ноҳия ташкил намуда буданд. Чорабинии "Шукӯҳи Истиқлол" дар Боғи фарҳангу фароғатии маркази ноҳия баргузор гардида, фазои идона ва руҳбаландӣ ҳукмфармо буд.

Ҳозирин бо барномаҳои гуногуни фарҳангиву ҳунарӣ, ки ба ифтихори ҷашни Истиқлолият таҳия гардида буданд, шоҳид шуданд. Мавзуи меҳварии барнома тақвияти ҳисси худшиносӣ, эҳтиром ба арзишҳои миллӣ ва қадрдонӣ аз дастовардҳои солҳои соҳибистиқлолӣ буд.

Дар идома, барномаи консертӣ низ ҷараён гирифта, сарояндаи шинохта Меҳронаи Хайриддин бо сурудҳои ватандӯстонааш саҳнаи чорабиниро ранги тоза бахшид ва бо иҷрои барномаҳои ҷаззоб мухлисонро шод гардонд. Иштироки фаъолонаи сокинон, ҷавонон ва намояндагони муассисаҳои давлатӣ нишон дод, ки Истиқлолияти давлатӣ барои ҳар як фарди кишвар арзиши муқаддас ва нерубахши созандагӣ мебошад. Чорабинӣ бо шодию нишот ва ташаббусҳои фарҳангӣ ҷамъбаст гардид.