МАСЪАЛАҲОИ СОҲАИ МАОРИФ ДАР ҚАБУЛИ САЙЁРИ ВАЗИР БАРРАСӢ ШУДАНД

            Санаи 18 октябри соли 2025 дар Муассисаи таълимии хусусии «Мактаби байналмилалӣ»-и ноҳияи Ҷалолиддини Балхӣ қабули сайёри шаҳрвандон бо иштироки вазири маориф ва илми Ҷумҳурии Тоҷикистон Раҳим Саидзода баргузор гардид. Ин иқдом дар доираи татбиқи дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба таҳким бахшидани робитаи мустақими роҳбарони ниҳодҳои давлатӣ бо шаҳрвандон ва расидан ба муроҷиати ҳар як сокини кишвар анҷом дода шуд.

Дар ҷараёни қабули сайёр хонандагону донишҷӯён, омӯзгорон ва намояндагони қишрҳои гуногуни ҷомеа ширкат варзида, масъалаҳои марбут ба фаъолияти муассисаҳои таълимӣ ва беҳсозии шароити таҳсилро матраҳ карданд. Аз ҷумла, сокинон оид ба сохтмони биноҳои иловагӣ дар назди муассисаҳои таълимӣ, таъмини мактабҳо бо мизу курсӣ ва таҷҳизоти зарурӣ, интиқоли донишҷӯён байни муассисаҳои таҳсилоти олӣ ва идомаи таҳсил дар дохил ва хориҷи кишвар пешниҳодҳои мушаххас иброз намуданд.

Вазири маориф ва илм Раҳим Саидзода баъди шунидани муроҷиатҳои шаҳрвандон ба масъулони сохторҳои дахлдор дастур дод, ки масъалаҳои матраҳгардида дар муҳлатҳои муайян баррасӣ ва ҳаллу фасл карда шаванд. Ӯ таъкид намуд, ки ҳадафи қабули сайёр ин баланд бардоштани сатҳи дастрасии шаҳрвандон ба хизматрасониҳои давлатӣ, шунидани мустақими фикру пешниҳоди онҳо ва таҳкими ҳамкории байни ҷомеа ва мақомоти давлатӣ мебошад.

Дар анҷоми мулоқот изҳор гардид, ки қабули сайёри шаҳрвандон минбаъд низ дар дигар шаҳру ноҳияҳои ҷумҳурӣ идома хоҳад ёфт. Ин иқдом имконият фароҳам меорад, то роҳбарияти вазорат бо воқеияти соҳа аз наздик шинос гардида, барои ҳалли масъалаҳои мавҷуда чораҳои амалӣ андешад.