МАҚОМОТ ДАР ПАҲЛУИ МАРДУМ: УСУЛИ "ДЕҲА БА ДЕҲА" ДАР АМАЛ

24 апрел - имрӯз дар деҳаҳои Шӯрзамин, Ангурзор ва Явондеҳи Ҷамоати деҳоти Навоии ноҳияи Ҷалолиддини Балхӣ вохӯриҳо дар доираи усули “Деҳа ба деҳа” баргузор гардиданд. Дар ин рӯз бахши кор бо занон ва оила, бахши сабти асноди ҳолати шаҳрвандӣ, шуъбаи Агентии меҳнат ва шуғли аҳолӣ дар ноҳия, инчунин намояндагони ҷамоати деҳоти Навоӣ иштирок намуданд.

Мақсади аслии вохӯриҳо баррасии мушкилоти мавҷудаи сокинон, расонидани маълумот оид ба хизматрасониҳои иҷтимоӣ, ҳуқуқӣ ва иқтисодӣ, ҳамзамон, фаҳмонидани ҳуқуқ ва уҳдадориҳои шаҳрвандон дар самтҳои мухталиф буд. Намояндагони бахши сабти асноди ҳолати шаҳрвандӣ ба аҳолӣ шарҳ доданд, ки чӣ гуна метавон асноди муҳими шахсиро ба қайд гирифт ва аз мушкилоти ҳуҷҷатгузорӣ ҷилавгирӣ кард.

Дар ҳамин ҳол, сардори шуъбаи Агентии меҳнат ва шуғли аҳолӣ имкониятҳои мавҷударо барои фарогирии бекорон ба омӯзишҳои касбӣ ва шуғли расмӣ шарҳ дода, сокинонро ба истифодаи ин фурсатҳо ташвиқ намуд. Ҳамзамон, бахши кор бо занон ва оила ба масоили марбут ба фаъолияти иҷтимоии занон, ташкили гурӯҳҳои занона ва рушди соҳибкории хурду миёна таваҷҷуҳ зоҳир намуд. Тавассути чунин мулоқотҳо роҳбарияти маҳаллӣ ва сохторҳои дахлдор метавонанд дар сатҳи деҳаҳо бо мушкилоти воқеии мардум аз наздик шинос шаванд ва барои ҳалли онҳо чораҳои амалӣ андешанд.