ҲАР КӢ БАР ДУШМАНИИ ХАЛҚ РАВОН АСТ ЧУ БАҲР, ЗУД БОШАД, КИ САРИ ХЕШ ЧУ ГИРДОБ ХӮРАД!

   Дар ҳошияи суханронии сардори раёсати Кумитаи давлатии амнияти миллии Тоҷикистон дар вилояти Хатлон муҳтарам Нусратулло Мирзозода ва раиси ноҳияи Ҷалолиддини Балхӣ муҳтарам Рустам Холиқзода дар вохӯри бо кормандони мақомоти давлатии ноҳияи Ҷалолиддини Балхӣ Вожаи "терроризм" ба лафзи лотинӣ мансубият дошта, "сиёсати тарсондан ва фурӯ нишондани душманони сиёсӣ, мазҳабӣ бо роҳи зурӣ, нобудсозӣ ва куштор" мебошад.

"Экстремизм" низ калимаи лотинӣ буда, маънии "пайравӣ ба назария ва чорабиниҳои ифротӣ (хусусан дар сиёсат)"-ро дошта, ифротталабӣ гуфтани клима мебошад. Ин ду калима, яъне терроризму экстремизм солҳои ахир ҳамчун ифодакунандаи зуҳуроти номатлуб мавриди истифодаи хеле зиёди расонаҳо, шабакаҳои иҷтимоӣ ва дигар васоити ахбор шудаанд.

Сабаби аслии афзоиши мавриди истифода қарор гирифтани ин вожаҳо он аст, ки дар заминаи воқеоти мухталифи ҷаҳон қувваҳои ифротие пайдо шудаанд, ки барои амалӣ намудани мақсадҳои нопоки худ даст ба тазоҳуроти ғайрирасмӣ мезананд ва дар дилу дидаи мардум ваҳшату тарсро ҷой месозанд.

Ин зуҳуроти номатлуб бо роҳҳои гуногун, аз ҷумла бо роҳи зурӣ ва фиреб ба сафҳои худ даровардани ашхоси аксаран ноустувор мавҷудияти худро муаррифӣ карда истодааст. Барои паст намудани мавқеи терроризму экстремизм ногузирии устувор гардонидани ақидаи мардум ба самти зиндагии шоиста ва ҳаёти хушбахтона мебошад.

Шарафёбии кишварҳои ҷаҳон дар пешгирии ин зуҳуроти номатлуб танҳо бо роҳҳои ташкилу фароҳамсозии шароити созгори зиндагии шаҳрвандон тавассути баланд бардоштани маърифати мардум ба даст оварда мешаванд. Баланд гардидани маърифати мардум ва тавассути он ташкили шароити зиндагии шоиста маҳаки асосии сиёсати мардуммеҳваронаи Ҳукумати Ҷумҳурии Тоҷикистон бо сарварии Пешвои муаззами миллат муҳтарам Эмомалӣ Раҳмон мебошад, ки таҳкими ин сиёсат вазифаи асосӣ ва ҷонии тамоми масъулони мақомоти иҷроияи ҳокимияти давлатӣ дар маҳалҳо дониста шудаанд.

Дар ин замина, роҳандозӣ шудани тадобири амниятӣ аз қабили ташкили вохӯрию суҳбатҳо ба аҳли ҷомеа, аз ҷумла бо мардуми меҳнаткаш ва иштирокдорони раванди таълиму тарбия ба воситаи ҷалби шахсони соҳибфарҳангу ватандӯст, собиқадору рӯзгордида бо усулҳои самарабахши тарғиботии "Мактаб ба мактаб" ва "Хона ба хона" натиҷаи хуб ба бор меоварад.

Моҳияти ин тадбирҳо бори дигар дар вохӯрии қарибулвуқӯи сардори раёсати Кумитаи давлатии амнияти миллии Тоҷикистон дар вилояти Хатлон муҳтарам Мирзозода Нусратулло бо роҳбарони сохторҳои гуногуни маҳаллӣ ва ҷамоатчигии ноҳияи Ҷалолиддини Балхӣ қайд гардид. Ташкили корҳо бо усули "Мактаб ба мактаб" ин такмили маҳорати корбарии маъмурони муассисаҳои таҳсилоти умумӣ ва тақвияти тадриси омӯзгорон дар самти устувор гардонидани тарбияи ватандӯстию худогоҳии насли ояндасози миллат мебошад.

Зарурияти ташкили ин усул он аст, ки мақомоти марбутаи давлатӣ оид ба таълиму тарбия бо иштирокдорони раванди таълиму тарбия дар самти мубориза алайҳи корҳои номатлуб ҳамкорӣ намоянд. Дар ин кор баргузории чораҳои муассир дар муассисаҳои таҳсилоти умумӣ аз қабили ташкили вохӯрию сӯҳбатҳо бо кормандони закии ниҳодҳои давлатӣ ва шахсони баруманди маҳал ва диёр, баргузории чорабиниҳои маърифатию фарҳангӣ ва таълимию варзишӣ миёни наврасон, боздид аз мавзеъ ё дидгоҳҳои таърихӣ, ҷалби наврасон ба озмунҳои дохилимуассисавӣ, байниноҳиявӣ, вилоятӣ, ҷумҳуриявӣ ва байналмилалӣ, фаъолгардонии маҳфилҳои касбомӯзӣ ва фаннӣ буда метавонанд.

Тадбирҳои номбурда метавонанд фазои холигии наврасонро пур намуда, онҳоро аз корҳои номатлуб махсусан, гаравидан ба гурӯҳҳои террористӣ ва ифротгаро ҷилавгирӣ намоянд. Усули "Хона ба хона" низ имкон фароҳам меоварад, ки дар баробари корҳои маърифатӣ ба тарзи зиндагӣ ва шароити кору бори ҳар як оила шиносоӣ пайдо намуда, дар ислоҳи норасоиҳои ошкоршуда дастаҷамъона фаъолиятро ба роҳ монанд. Мақомоти иҷроияи ҳокимияти давлатии ноҳияи Ҷалолиддини Балхӣ бо роҳбарии раиси муҳтарам Холиқзода Рустам Ҳикматулло, зери ҳидоятҳои созандаи Пешвои муаззами миллат муҳтарам Эмомалӣ Раҳмон дар самти мубориза алайҳи шомилшавии ҷавонон ва шаҳрвандон ба гурӯҳҳои ифротгаро чораҳои муассирро роҳандозӣ намуда, тамоми амалҳои номатлуби террористону экстремистонро маҳкум менамоем ва мегӯем : Ҳар кӣ бар душмании халқ равон аст чу баҳр, Зуд бошад, ки сари хеш чу гирдоб хӯрад.

 Дар хотир бояд дорем, ки корҳои шоистаи ҳар фарди ҷомеа ва ҳимояи манфиатҳои миллӣ нишонаи зафар бар ифротгароён аст. Шаҳло ШУКУРЗОДА, муовини раиси ноҳияи Ҷалолиддини Балхӣ оид ба соҳаи иҷтимоӣ