"ШУКӮҲИ ИСТИҚЛОЛ" - РАМЗИ ВАҲДАТУ САРФАРОЗИИ МИЛЛӢ

      Истиқлолият барои ҳар миллат на танҳо як санади сиёсӣ, балки рамзи шараф, нишони озодӣ ва кафолати бақои давлату миллати он ба шумор меравад. Таърихи башарият борҳо собит намудааст, ки   танҳо  миллатҳое  метавонанд   дар  ҷаҳони пуртазоди имрӯза бо ифтихор зиндагӣ кунанд, ки соҳибистиқлол ва соҳибдавлат бошанд. Миллати тоҷик, ки дорои таърихи ҳазорсолаи пурифтихор аст, имрӯз бо шарофати Истиқлолияти давлатӣ дар сафи кишварҳои озоду соҳибихтиёр қарор гирифта, тавонистааст заминаи давлатдории демократӣ, ҳуқуқбунёд, дунявӣ ва ягонаи худро устувор созад. Ҳифзи ин неъмати бебаҳо масъулияти ҳар фарди кишвар аст. Танҳо бо ваҳдат, меҳнати содиқона ва талоши якдилона мо метавонем истиқлолро устувор нигоҳ дошта, Ватани азизамонро ободу зебо гардонем.

Истиқлолият на танҳо дастоварди сиёсӣ, балки заминаи таҳкими Ваҳдати миллӣ, пойдории сулҳу субот, рушди худшиносӣ ва ватанпарастӣ мебошад. Аз ин рӯ, ҳар як шаҳрванд уҳдадор аст, ки дар роҳи рушду шукуфоии давлат ва ҳифзи суботи ҷомеа саҳми арзанда гузорад. Ба истиқболи 34-умин солгарди Истиқлолияти давлатии Ҷумҳурии Тоҷикистон, дар саросари кишвар омодагиҳо ва чорабиниҳои фарҳангию маърифатӣ идома доранд.

Шаҳру навоҳӣ бо баргузории барномаҳои гуногун руҳияи ифтихору ватандӯстиро миёни сокинон боло мебаранд. Дар ин замина, шоми 13 август, дар Боғи фарҳангиву фароғатии ноҳияи Ҷалолиддини Балхӣ чорабинии тантанавие таҳти унвони «Шукӯҳи Истиқлол» баргузор гардид. Ин барнома аз ҷониби Шабакаи муассисаҳои кумаки аввалияи тиббию санитарии ноҳия ва зерсохторҳои он, шуъбаи дезинфексия, Маркази ташхиси тиббию иҷтимоӣ ва беморхонаи хусусии "Наҷоти Сино" ташкил шуда, бо иштироки роҳбарияти ноҳия, намояндагони ташкилоту муассисаҳо, фаъолони ҷомеа ва сокинони сершумор сурат гирифт.

Фазои идона бо ҳузури сарояндаи хушсадои кишвар Беназир ранги тоза гирифт. Сурудҳои ватандӯстона, намоишҳои фарҳангӣ ва баромадҳои ҳунармандон шомро пурмаъно ва хотирмон сохтанд. Чорабинӣ бо эҳсоси ифтихор аз истиқлол, руҳияи ваҳдат ва орзуи рушди минбаъдаи Тоҷикистон анҷом ёфт.