БАРНОМАИ ИДОНА ВА КУМАКҲОИ МОДДӢ БАРОИ МУҲОФИЗОНИ ВАТАН

            Ба муносибати 34-умин солгарди Истиқлолияти давлатии Ҷумҳурии Тоҷикистон, рӯзи 9 сентябр бо ташаббуси Бахши дин, танзими ҷашну маросими мақомоти иҷроияи ҳокимияти давлатии ноҳияи Ҷалолиддини Балхӣ ба Дидбонгоҳи сарҳадии Қалъаи Файзободи Қисми ҳарбии 0306 РҚС Кумитаи давлатии амнияти миллӣ воқеъ дар ноҳияи Панҷ маводи хӯрока ва ашёи зарурӣ расонда шуд.

Тибқи иттилои масъулин, кумакҳо аз маҳсулоти аввалия - равған, шакар, намак, орд, биринҷ, макарон, гӯшт, картошка, пиёз, сабзӣ, лӯбиёгиҳо, обҳои нӯшокӣ ва дигар маводи зарурӣ иборат буданд. Ҳайати масъул пас аз супоридани мавод аз шароити хизмату зиндагии сарбозон - ошхона, ҷойи хоб ва инфрасохтори дидбонгоҳ дидан намуда, бо ҳайати шахсӣ мулоқот карданд.

Дар рафти суҳбат таъкид гардид, ки таваҷҷуҳи пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба беҳбуди шароити хизматӣ ва зиндагии сарбозон, далели ғамхории давлату ҳукумат нисбат ба муҳофизони Ватан мебошад. Дар дидбонгоҳ сарбозоне хизмат мекунанд, ки аз гӯшаву канори ҷумҳурӣ, аз ҷумла аз ноҳияи Ҷалолиддини Балхӣ сафарбар гардидаанд. Онҳо содиқона ба адои қарзи шаҳрвандӣ машғул буда, ирода ва садоқати худро ба давлат, миллат ва арзишҳои миллӣ иброз медоранд.

Сарбозон ва роҳбарияти дидбонгоҳ аз дастгирии пайвастаи Ҳукумати Ҷумҳурии Тоҷикистон ва мақомоти иҷроияи ҳокимияти давлатии ноҳияи Ҷалолиддини Балхӣ изҳори сипос намуда, таъкид доштанд, ки бо ифтихор Ватанро ҳимоя мекунанд ва ба Пешвои миллат содиқ мемонанд. Дар идомаи ин чорабинӣ, ба хотири болидахотирӣ ва руҳбаландии хизматчиёни ҳарбӣ дастархони идона ороста шуд. Ҳамзамон, ҳунармандони бахши фарҳанги ноҳияи Ҷалолиддини Балхӣ барномаи фарҳангиро пешниҳод намуда, ба сарбозон фазои идона бахшиданд.