МАШҚҲОИ ТАКТИКӢ - ЗАМИНАИ ҲИФЗИ АМНИЯТИ ШАҲРВАНДОН АЗ ОТАШСӮЗӢ

          Шоми 2 сентябри соли 2025 дар ноҳияи Ҷалолиддини Балхӣ машқи васеи тактикии оташнишонӣ баргузор гардид. Ин машқ бо ташаббуси Қисми 28-уми Хадамоти ҳарбикунонидаи давлатии оташнишонӣ ва таҳти роҳбарии майори хизмати дохилӣ Сатторзода Носир Саттор сурат гирифт. Машқ дар ҳудуди бозори ҶДММ «Баҳор» роҳандозӣ шуда, ҳадафи он баланд бардоштани сатҳи омодагии касбӣ ва таҷрибаи амалӣ кардани кормандони оташнишонӣ дар шароити воқеӣ буд. Тибқи иттилои масъулин, чунин машқҳо имконият медиҳанд, ки ҳайати шахсӣ малакаҳои зарурии худро сайқал дода, дар ҳолати сар задани ҳолатҳои фавқулодда бо вокуниши саривақтӣ ва ҳамоҳанг амал намоянд. Дар ҷараёни машқ, кормандони оташнишонӣ амалан таҷрибаи хомӯш намудани оташсӯзӣ дар шароити шаҳрӣ, истифодаи техникаи махсус, наҷоти шаҳрвандон ва ҳамоҳангии гурӯҳӣ ҳангоми бартарафсозии ҳодисаҳоро мавриди омӯзиш қарор доданд. Ҳамзамон тарзу усулҳои таъмини амнияти мардум ва ҳифзи молу мулк аз сӯхтор низ мавриди коркарди амалӣ қарор гирифт. Тавре таъкид шуд, машқҳои омодагии касбӣ нақши калидӣ дар фаъолияти хадамоти оташнишонӣ доранд, зеро маҳз чунин тамринҳо имкон медиҳанд, ки кормандон дар рӯбарӯ бо вазъиятҳои ғайричашмдошт таҷрибаи воқеӣ андӯхта, омодагии худро барои ҳифзи ҳаёт ва амволи шаҳрвандон тақвият бахшанд.