КВОТА - ИМТИЁЗ БА ТАҲСИЛ  Санаи 31 марти соли ҷорӣ дар толори шуъбаи маорифи ноҳияи Ҷалолиддини Балхӣ даври озмуни ноҳиявии санҷишҳои имтиҳонии дохилшавӣ тариқи квотаи Президенти Ҷумҳурии Тоҷикистон баргузор гардид. Дар ин рӯз аъзои комиссияи квотаи Президентӣ аз тарафи Мақомоти иҷроияи ҳокимияти давлатии ноҳияи Ҷалолиддини Балхӣ иштирок намуданд. Тибқи иттилои шуъбаи маорифи ноҳия дар озмун хонандагони муассисаҳои ҳудуди ноҳия ҷиҳати дарёфти роҳхат ба даври ниҳоӣ 139 нафар хатмкунандагон роҳхат гирифта, ширкат варзиданд. Соли ҷорӣ шумораи квотаи Президентӣ барои ноҳияи Ҷалолиддини Балхӣ 24 нафарро ташкил намуд, ки аз ҷумла 12 нафар духтар аз рӯи 12 ихтисос роҳхат ба даври вилоятӣ гирифта аз рӯи ҳар ихтисос то шаш нафар довталаб ба даври ниҳоии озмун роҳ ёфтанд.  Ёдовар мегардем, ки ҷиҳати баланд бардоштани савияи дониши хонандагон ва ҳавасманд гардонидани ҷавонон дар рӯҳияи илмомӯзиву маърифатпарварӣ Ҳукумати кишвар таҳти сарварии Пешвои муаззами миллат муҳтарам Эмомалӣ Раҳмон ба наврасону ҷавонон таваҷҷуҳи хосса зоҳир намуда, бобати дарёфти чеҳраҳои болаёқат имтиёзҳои заруриро фароҳам овардаанд. Парвина АҶИКОВА, "НАВИДИ БАЛХ"

    ДАЪВАТИ НАВАСКАРОН БА ХИЗМАТИ ВАТАН-МОДАР

   Мусаллам аст, ки бузургии ҳар як давлат аз ҳастии артиши он вобастагии амиқ дорад, зеро вазифаи ҳар як сарбоз посбонӣ намудани марзи кишвари худ мебошад. Ба ин хотир имрӯз 1 апрели соли 2023 дар Комиссариати ҳарбии ноҳияи Ҷалолиддини Балхӣ бо иштироки раиси ноҳия муҳтарам Холмурод Раҳмон, раисони ҷамоатҳои шаҳраку деҳоти ноҳия ва волидони даъватшудагон чорабинии идона бахшида ба оғози даъвати баҳории ҷавонон ба хизмати ҳарбӣ баргузор гардид. Дар оғози чорабинӣ раиси ноҳия муҳтарам Холмурод Раҳмон суханронӣ намуда, даъватшудагонро ба рӯзи аввали хизмати Ватан-Модар табрик карданд. Қайд гардид, ки нақши ҳомиёни Ватан дар таъмини амнияту осудагии мардуми ҷумҳурӣ хеле бузург мебошад.

   ОЗМУНИ ҶУМҲУРИЯВИИ «САЙРИ ГУЛИ ЛОЛА» Ҷаласаи комиссияи озмуни ҷумҳуриявии «Сайри гули Лола» дар ноҳияи Ҷалолиддини Балхӣ барои соли 2023 таҳти раёсати намояндагон муовини якуми раиси ноҳия Холиқзода Рустам, барои муайян намудани ғолиби озмуни ҷумҳуриявии «Сайри гули Лола» аз рӯи номинатсияҳои пешниҳодгардида дар ноҳияи Ҷалолиддини Балхӣ баргузор гардид. Холиқзода Рустам, раиси комиссияи ноҳиявӣ иброз намуд, ки тибқи талаботҳои Низомномаи озмун ба Комиссияи озмун номзадии ҷамоатҳои шаҳраку деҳот аз рӯи номинатсияҳои гуногун пешниҳод шудааст. Қайд карда шуд, ки бо мақсади баланд бардоштани сатҳи донишу маърифат, фарҳангу ҷаҳонбинӣ, бедор намудани завқи зебоипарастӣ дар зеҳни ҳар як сокини ноҳия, ободу зебо намудани ҳар як хона, кӯча, деҳа, маҳалла ва сазовор пешвоз гирифтани ҷашни 35- солагии Истиқлоли давлатии Ҷумҳурии Тоҷикистон дар ноҳия озмуни «Сайри гули Лола» гузаронида мешавад. 

ИТТИЛОИЯ ДАР БОРАИ ИҶЛОСИЯИ ШОНЗДАҲУМИ МАҶЛИСИ ВАКИЛОНИ ХАЛҚИ НОҲИЯИ ҶАЛОЛИДДИНИ БАЛХӢ, ДАЪВАТИ ШАШУМ Санаи 30 марти соли 2023 дар толори Мақомоти иҷроияи ҳокимияти давлатии ноҳия иҷлосияи шонздаҳуми Маҷлиси вакилони халқи ноҳияи Ҷалолиддини Балхӣ, даъвати шашум таҳти раёсати раиси ноҳия муҳтарам Холмурод Раҳмон бо иштироки намояндаи Мақомоти иҷроияи ҳокимияти давлатии вилояти Хатлон, муовини раиси вилоят муҳтарам Файзуллозода Заробиддин, муовини якум, роҳбари дастгоҳи раиси ноҳия, роҳбарони сохторҳои мақомоти иҷроияи ҳокимияти давлатии ноҳия, мақомоти ҳифзи ҳуқуқ, ташкилоту муассисаҳо, раисони ҷамоатҳои шаҳраку деҳот баргузор гардид

 КУРСИ САЙЁР ОИД БА ПЕШГИРИИ ТЕРРОРИЗМ ВА ЭКСТРЕМИЗМ      

     Аз 29 то 31 марти соли 2023 дар китобхонаи марказии ноҳияи Ҷалолиддини Балхӣ бо иштироки директори Донишкадаи такмили ихтисос ва бозомӯзии хизматчиёни давлатӣ, номзади илмҳои педагогӣ дотсент Ғанизода Ибодат Ғанӣ ва ҳайати устодони донишкада курси сайёри такмили ихтисос барои муовинони раисони ҷамоатҳои шаҳраку деҳоти ноҳияҳои минтақаи Бохтари вилояти Хатлон оид ба соҳаи иҷтимоӣ аз рӯи барномаи «Шарҳи Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон» ва «Нақши мақомоти худидоракунии шаҳрак ва деҳот дар пешгирии терроризм ва экстремизм» баргузор гардида истодааст. Парвина АҶИКОВА, "Навиди Балх" 

ТАҶЛИЛИ ҶАШНИ НАВРӮЗИ БАЙНАЛМИЛАЛӢ ДАР НОҲИЯИ ҶАЛОЛИДДИНИ БАЛХӢ

   Санаи 22 марти соли 2023 дар Ҷамоати деҳоти Маданияти ноҳияи Ҷалолиддини Балхӣ бо иштироки раиси ноҳия муҳтарам Холмурод Раҳмон, намояндаи Ҳукумати Ҷумҳурии Тоҷикистон дар ноҳияи Ҷалолиддини Балхӣ Икромӣ Сироҷиддин Салом, намояндаи Мақомоти иҷроияи ҳокимияти давлатии вилояти Хатлон Холов Гулмаҳмад, кормандони ташкилоту муассисаҳо ва сокинони ноҳия Наврӯзи байналмилалӣ бо шукӯҳи хос таҷлил карда шуд. Дар ҷашнвораи наврӯзӣ сокинон ва ҳунармандони ҷамоатҳои шаҳраку деҳоти ноҳия фаъолона иштирок намуда, номгӯи ҳунарҳои мардумии хешро, ки маҳсули меҳнату заҳмати онҳо мебошад, ба марази тамошо гузошта буданд.

 САФАРИ КОРИИ РАИСИ ВИЛОЯТИ ХАТЛОН МУҲТАРАМ ДАВЛАТАЛӢ САИД БА НОҲИЯИ ҶАЛОЛИДДИНИ БАЛХӢ

  Дар арафаи ҷашни Наврӯз субҳи имрӯз раиси вилояти Хатлон муҳтарам Давлаталӣ Саид ба ноҳияи Ҷалолиддини Балхӣ сафар намуд. Дар ин сафар раиси вилоят дар деҳаи «Чорбоғ»-и ҷамоати деҳоти Навободи ноҳияи Ҷалолиддини Балхӣ Муассисаи таълимии наву замонавиро, ки бахшида ба ҷашни Истиқлолияти давлати бунёд ёфтааст ва ба ҷашни Наврӯзи фархунда рост омадааст ҳамчун туҳфаи идона ба истифода супорид. Таълимгоҳ аз ду ошёнаи барҳаво, 10 синфхона, ошхона, китобхона ва ҳуҷраҳои иловагӣ иборат буда, барои зиёда аз 600 нафар хонандагон дар ду баст пешбини шудааст. Сохтмони муассисаи таълимӣ бо назардошти фарогирии ҳарчи бештари хонандагон ба илмомузӣ, махсусан бо зиёд шудани теъдоди хонандагон дар доираи татбиқи барномаҳои ҳукуматии марбут ба рушди соҳаи маориф ва таҳкими инфрасохтори соҳа қомат афрохта бо мавриди истифода қарор гирифтани он шумораи муассисаҳои таълимӣ дар ноҳияи Ҷалолиддини Балхӣ ба 71 муассиса расид. Акнун ин таълимгоҳ ҳамчун муассисаи таълимии миёнаи умумии №71 фаъолияти хешро идома хоҳад дод.

                      БУНГОҲИ ТИББӢ - ТУҲФАИ НАВРӮЗӢ

   Дар арафаи иди Наврӯзи байналмилалӣ санаи 21 марти соли равон дар деҳаи Навободи Ҷамоати деҳоти Навобод бо иштироки раиси ноҳияи Ҷалолиддини Балхӣ муҳтарам Холмурод Раҳмон як бунгоҳи саломатӣ кушода гардид. Бинои мазкур аз 3 ҳуҷра ва як роҳрав иборат буда, як ҳуҷраи момодоя, эмгузаронӣ, ҳамшираи гашти хонаҳо, инчунин як сартарошхона ва ҳуҷраи дигар барои раиси маҳалла низ мавҷуд аст. Ин бино аз ҳисоби сокинон бо маблағи 130 ҳазор сомонӣ бунёд шудааст.  То анҷом ва ба истифода додани он раиси маҳалла Сафарбой Бердиев ва мудири бунгоҳ Замира Абдулҳамидова бо 350 нафар хоҷагиҳои маҳалла саҳми худашонро расониданд. Дар кушодашавии ин бинои нав раиси ноҳия муҳтарам Холмурод Раҳмон суханронӣ намуда, аҳли маҳалларо бо фарорасии Иди Наврӯзи-2023 таҳният намуд. Ба истифода додани бинои бунгоҳи тиббиро як туҳфаи хотирмони наврӯзӣ арзёбӣ карданд.

   ИҚДОМИ НЕК ДАР АРАФАИ ИДИ БАЙНАЛМИЛАЛИИ НАВРӮЗ      

  Санаи 21 марти соли 2023 дар арафаи Иди байналмилалии Наврӯз ба Дидбонгоҳи сарҳадии Калъаи Файзободи Қисми ҳарбии 0306 РҚС КДАМ Ҷумҳурии Тоҷикистон дар ноҳияи Панҷ аз тарафи Мақомоти иҷроияи ҳокимияти давлатии ноҳияи Ҷалолиддини Балхӣ маводҳои хӯрока кӯмак расонида, ба сарбозони дидбонгоҳи мазкур дастархони идона ороста шуд.

    БАРГУЗОРИИ МУСОБИҚАИ ФУТБОЛ Аз 1 то 17 марти соли 2023 мусобиқаи футболи хурд байни кормандони ташкилоту муассисаҳои ноҳиявӣ барои дарёфти "Ҷоми раиси ноҳияи Ҷалолиддини Балхӣ" бахшида ба ҷашни Наврӯзи байналмилалӣ баргузор гардид. Дар даври финалӣ дастаи Прокуратура ба дастаи шабакаҳои барқ ғолиб омада, соҳиби Ҷоми мусобиқаи футбол гардид. Ғолибон бо диплом, Ҷом, медал ва тӯҳфаҳои хотиравӣ аз ҷониби муовини якуми раиси ноҳияи Ҷалолиддини Балхӣ муҳтарам Холиқзода Рустам, прокурори ноҳия Собирзода Искандар сарфароз гардонида шуданд. Инчунин беҳтарин дарвозабон, ҳимоятгар, нимҳимоятгар, нишонзан ва бозингари беҳтарин муайян ва бо мукофотҳо қадр карда шудан.